林景楠︰只要相信有可能就做得到

林景楠認為「香港人」是一種精神，無論去到世界各地，香港人的熱誠、活力、創意同精神都不會變。

香港電視創辦人王維基早前在個人Facebook上寫到︰

「十七歲，我説要開辦一間補習學校，他們說無可能 ... (終於補習學校收了四百學生）

三十歲，我説要做IDD挑戰香港電訊，他們説無可能....

三十九歲，我説要在香港建一個光纖網絡，他們說無可能....

五十一歲，我說要在香港做網購，他們說無可能.....

五十八歲的今天，我説我要把由一香港人建立的網購平台軟件系統，賣給去全世界，他們説無可能.....

一些人一生都在説「無可能 」」

5年前，仍時香港海關一員，食政府糧，過着安穩生活，因參與「光復沙田」接受電視台訪問，說了反對政府的言論，結果被親政府人士起底，一年後被政府炒魷，「好記得，我個女當年8月29日出世，政府10月5日停我職，嗰日係我生日，12月21日正式解僱，當時個女剛剛3個月大！」林景楠記得清楚。

女兒剛出世、泰籍老婆剛到香港，林景楠得罪政府，失去穩定工作，對家看在眼內，兩個字「抵死」。豈料香港人就是有一種打不死的精神，向銀行借十萬，All in搞阿布泰，租一間九龍城60呎小店，擺滿泰國零食，放一張BB床，老婆做事頭收錢，一家三口租舖上的百多二百呎劏房，自己一手一腳，由入貨、執貨、上架、物流全程投入，你想我死，我偏不死。

「當時有啲政見唔同嘅人，見我仲未死得，仲開到舖，就喺網上恐嚇，話燒我間舖。」創業初期，政治立場惹來恐嚇，女細老婆嫩，自己也只得26歲，5年後的今天生意愈做愈大，林景楠仍然是林景楠，「擔心？唔會擔心，都無得擔心，如果終有一日到咗有人喺我舖偷嘢，報警都幫唔到我，咁我會選擇撤資，因為呢個地方已經唔值得投資！」

借10萬All In創阿布泰

5年前離開政府，All in搞阿布泰，由一間60呎小舖，到今日全港21間分店，林景楠拋下一句︰「只要相信有可能，就會做得到！你睇吓王維基！人人都覺得佢唔得，但最後佢得咗，天時地利人和都幫埋佢！」

林景楠的太太是泰國人，一場到泰國之旅，他與太太一見鍾情，「你信唔信緣份？就係咁我同佢結咗婚！我唔識泰文，溝通未用手語！」在泰國打政府工的太太婚後來港定居，才有九龍城的阿布泰，一切都是啱啱碰上剛剛。九龍城是香港小泰國，太太初來港，在該區落腳打理小生意自然不過，林景楠又剛剛好被政府停職，太太又剛剛好是泰國人，自己又喜歡到泰國旅行，又剛剛好林景楠有着香港人打不死的精神，這一切成就阿布泰由初初的二人小店，變成今日有200多人的企業。

「做生意就係咁，睇中就要去搞，無錢都要借錢返來搞，如果你係對自己有信心，又唔去做，咁就唔適合做生意。」

對自己有信心，是否百戰百勝？「衰過唔同大家講姐，大家都睇到成功一面，講真我入錯過貨，都試過賣唔出，咁點？未諗計清咗佢，失敗係成功之母嘛，最緊要之後唔好再犯同樣錯誤，同對自己有信心，控制好個Cash Flow，再來過囉！」

做零售，入貨最難，入錯貨賣不出，足以令公司執笠，「啲貨都係我親自去搵，因為我係香港人，我知道香港人需要咩，例如去Big C，香港鍾意買邊類零食，我會親自去入返來。」香港人為香港人，是他的信念。

「好似肺炎疫情初期，我即刻叫所有泰國同事停晒手上工作，我都飛埋過去，去全泰國口罩廠搵口罩，香港爆疫情，我即刻有口罩賣，成本價，部分係捐出去！」他找了500萬片口罩，每片只要賣貴1蚊，他已賺500萬，但他選擇成本價，「出面賣緊2、3百蚊一盒，我都係幾十蚊，點解？因為我係香港人！」

《蘋果日報》被警方上門搜查，全港憤怒，華潤旗下的便利店拒絕出售，林景楠立即找蘋果發行部傾，「你唔賣我賣！」。(阿布泰FB圖影片)

香港人，簡簡單單三個字，他說得鏗鏘有力。因為是香港人，他去年在反修例運動初期已決定加入罷市，生意都不做，賺都不賺，希望喚醒更多人的良知，引起社會回響；因為是香港人，他登《蘋果日報》頭版廣告，證明無需懼怕對手威脅；因為是香港人，他決心走上政治，參選立法會為香港人發聲。

因為我係香港人

「我政治發聲，唔係因為要抽政治水，係因為我係香港人，應該要去維護香港核心價值。我係生意人，就更加有呢個商人責任、社會責任，無人肯做第一，我未去做第一囉，做完大家發覺無事，未一齊做，做生意之餘，我係要表達我係香港人，希望為香港人做啲嘢！」

你想做，有時政權不讓你做。立法會選舉延期，明年政局如何改變，無人能知，但「為香港人做啲嘢」的心態不變，阿布泰陸續最近加入了香港品牌的貨品，「依家已經有一成左右貨係香港品牌，一來令阿布泰多元化啲，無咁悶，二來我最想係將香港品牌帶返去泰國，協助香港品牌帶去世界，只要佢哋賣多咗產品，自然就可以壯大香港品牌，大家互相幫忙！」

香港人互相幫忙，但「香港一些官員」不爭氣。過去一年，香港政局史無前例地惡化，《港版國安法》橫空出世，界線之闊，無遠弗屆，「做生意最怕模糊，我哋派咗成年良知貼紙，點知之前有個後生仔被拉咗，因為身上有一堆貼紙，當中一張係良知，個罪名係未會因為一張貼紙入罪呢？我哋都唔知，但做人最基本係有良知，良知係無罪同無價，條法例咁模糊，大家又點守法呢？當做唔到，就會考慮離開。」

林景楠陸續引入更多香港品牌，白蘭樹下就是其中一款。(阿布泰FB圖片)

林景楠有兩個女兒，未來離開與否，也是為了下一代的生活，「我一直都覺得香港人呢三個字，係一種精神，唔一定建基於香港，就算未來香港真係一國一制，香港消失咗，香港人依然喺到，我哋去到世界各地，都可以驕傲同人講，我係香港人，香港人嗰份熱誠、活力、創意同精神，去到邊到都好，都係唔會變！」

由鐵飯碗到創業，5年時間，林景楠說︰「精彩！」展現的亦是香港人精神，「點樣逆境自強不息，努力發掘一條新出路，遇強越強，遇到打壓，打你唔死，你就會更堅壯，更堅強！」這就是阿布泰的故事，只要相信可能，就會做得到！

創業初期，林太說想將泰國的Big C搬來香港，林景楠笑說︰「點解無可能？大家拭目以待。」

~ 完 ~